أبغى أنشّدلكم .. تسمحولي ؟؟

[المسفلاوية]

لحظة .. لحظة .. لحظة ...
لا تروحوا تتفجعوا .. وتحسّبوني .. فقي نمنم ؟؟ بيغني على ديلو المقطوع !!

لا حبّيت أحكيلكم عن ترانيم الهندله .. وكلماتها الجميلة ،،، خلينا نعيش جوّ المسفلة وندحدر على ورى كم سنه .. عشان تعرفوا جمال هديك الأيّام ..
،
،
،
،

يا الله .. سترك وعفوك ورضاك والجنّة ، وفلّة وبونتياك وعشره ملايين وغرفة ريالات وعروسة حلوة

إشبك يا ولد القندول : من صباحية ربّنا عشمان عروسة ؟؟
والله يا خويّ أبو الكلام : تراك أبو هرج روّقني تراني قفلان آخر قفلة وما في شيء يروّق نافوخي !!

أبو الكلام : يا شيخ حط أعصابك في تلاّجة واسمع كلامي .. وسيبك من وجع الدماغ .. عندي لك فكرة حلوة ..
ولد القندول : إيش ياخد الريح من البلاط الأملس ؟؟ هو عندك شيء يفيد ؟؟ هيّا أعطيني فكرتك ..

أبو الكلام : شفتلّك عرووسة صغنّونة حلوة .. تقبّل أياديّ لو عرفتها ؟؟
ولد القندول نقز من مكانو وأخذ بتلابيبو : ياواد من جدّك الشي اللي تقول ؟؟

أبو الكلام : هيّا أوّل فطّرني فول المنسي .. وبعدين خد العلوم الزينة ..
ولد القندول : ياشيخ أفطرك وفوقها تعميرة .. بس قلّي بنت مين ؟؟ هيّا لا تجبلي الصمرقع !!

أبو الكلام : بس أوّل قلّي إشبها أم العيال ( فتّو ) إنسانة طيبة .. وتحبّك وانت ناوي تخرب بيتها ؟؟
ولد القندول : إيش تبغاني أسوّيلها .. قاعدتلي ركبه ونص .. فين رايح فين جاي ؟؟ وما شاء الله عليها زيّ المنشار .. طالع آكل ونازل آكل .. فلّستني .. هات هات .. هات هات ، وماشاء الله عليها كلّ سنة خلفة .. ما أدري أنا متزوّج فقّاسة وللا إيش ..

أبو الكلام : يا أخي أشكر ربّك جايبتلك أولاد كلّهم حفظة قرآن .. وبزورة زيّ النجف .. وعقول توزن بلد .. رافعين راسك ، مو زيّ بزورتي خيابة .. تطالع في راس الواحد منهم .. بدل ما تشوف علم تشوف خطّ السريع وخطّ الكر .. من كتر الفقشات والمضاربات ..
ولد القندول : والله صادق .. بس شويّا دوخااان من السهر عشان كدا مني طايق خَلقي ..

أبو الكلام : إيش مسهرك ياهووو .. عسى بتعدّ النجوم ؟؟
ولد القندول : يا شيخ ولدي النونو طول الليل مشغّل الونّان .. والحرمة تهندلّو وتنشدلو بصوتها الحلو .. فدخلت في جو تاني .. وسبحت في تفكيري وطار النوم !!

أبو الكلام : ها وبعدييين ؟؟
ولد القندول : بصراحة سرّحت بعيد .. وفكرت أتزوج وحده تانية أروق راسي من الإزعاج هدا !! وجاري في سوق الليل " عم سعيد السوري " عندو وحده بسم الله ما شاء الله عليها اسمها " يارا " فكرت أكلّموا .. عليها ..

أبو الكلام : ياشيخ حرام عليك عندك وحده .. زيّ البخا ، زعلت نصّ الحارة يوم اتزوجتها كلّهم حاطين عينهم عليها .. وفوق هذا تبغى تتزوج عليها ..
ولد القندول : والله صادق بس ماتنشدلي زيّ تنشد للبزورة ..

أبو الكلام : طيب يا سيدي أرقد زيّ البزورة وقلها نشديلي يا كوكبة الغرب ..

حسبي ربي .. جلّ الله ..
مافي قلبي .. غير الله ..

حبيبي محمد صلى الله
....لا إله إلاّ الله ....

حسبي ربي .. جلّ الله
قندول حبيبي .. حبيب الله

ولد القندول : والله ذكرتني بأمي - الله يرحمها - يوم كانت تسهر الليل عشاننا وتنشدلنا !!


نعم هكذا كانت تغرس العقيدة والتوحيد في قلوب بزاريننا.. بهذه الأناشيد والكلمات البسيطة ..

وتعرفنا بقدر حبيبنا وقدوتنا وإمامنا - صلى الله عليه وسلم - صلّو عليه ..

وكانت الأم ماتنام إلين تنفث على بزورتها بالمعوذات .. وتخليهم يتوضوا قبل النوم ويقروا الأذكار ..

وفين هذا الزمن البزورة يناموا على موسيقى هادئة .. قال عشان تهدي أعصابهم .. لا حول ولا قوة إلاّ بالله بالطن والرن .. وبـ (( لهو الحديث ليضلّوا عن سبيل الله )) .. وحسبنا الله ونعم الوكيل ..

وبعدين ما أدري إيش حكم " الباربي " والدب الكبير والحيوانات العرائس في غرف الأطفال يناموا وهي على سريرهم وتحت راسهم .. ما أدري تدخل الملائكة " الفريستا " في الغرفة عندهم وللا لأ ..

وتحصلوا البزورة غرفهم كلها صور فلم كرتون .. في الجدار .. ما أدري إيش حكم هدا التاني ..

وعلى العموم .. الله يحفظ بزورتنا ، ويعيننا على تربيتهم على العقيدة والتوحيد وعلى الكتاب والسنة ..

ربي يحفظ .. يحفظ

وأسيبكم في أمان الله .. والله يخليكم انتبهوا على بزورتكم

 

[ابو وجدان البرماوي]

يا المسفلا وية اشياء كتيرة ما فهمتها
لعل غيري يفهمها
على العموم
مشكوووووورة والله يعطيك الف عافيه

 

[ندى الجنة]

من أوّل مستنية مواضيعك .. وحكاياتك الحلوة ..
وفيها لفتات تربوية حلوه زيك ..
بأسلوب رايع وجذاب .. وكلمات مكاوية نتمنى نسمعها في جلستانا ..

مشكوررة يا كدونجية

 

[أبو هيثم الشاكر]

فعلا (مسفلاوية) والله رونقة القصة في طريقة حكايتك لها، حفظك الله.

 

[الرائع]

أهلين بصاحبة الأسلوب المحبب إلى الأسماع ..

أسلوب جذّاب يجعل الواحد يركز في الطرح ، وبعدها تأخذيه إلى وقفة ودرس تربوي رااائع

بس يا أختي لو تستمرّي على هذا النهج .. وتسيبك من المداقشات مع ( الباشا ) وغيره أليس أفضل لك وأنفع ؟؟

سؤال ثاني : إيش معنى ولد القندول ؟؟

وتحياتي لكِ

 

[أسومي]

ياشيخ أفطرك وفوقها تعميرة ............. عسى ما تقصدين الحشيش

 

[أحمد الأركاني]

يعطيك العافية
على الأسلوب

ننتظر جديدك

 

[نسمة سَحَر]

تسلمي يالغالية على القصة الجميلة المفيدة ،،،

والله يجزاك خير ويعطيك العافية

 

[القنا ص]

مشكوووووورة والله يعطيك الف عافيه


ومن فين المسفلة

 

[هيمو_]

مشكورةعلى الطرح الجميل.

 

[محمدR]

ياريت لو كنت ولدت وقتها لكن

يلا الجيات أحلى وأكتر إن شاء الله

 

[عيال الشنشنة]

تسلمي يدينك



تقبلي مروري
الوااد هيمااا
برنس عيال الشنشنة والوناسة

 

[تاج رأسك]

مادرينا إنك حكواتيه
ولا الكلام منقول من( حكتني أمي في الناموسية)
ولا بتصيري بديع الزمان الهمذاني
يا المســفـــــــــــــــــــــــــــــــــــــــلاوية