فتّو .. جيبيلي مويه من عند الجيران

[المسفلاوية]

الجيرة وبيت الجيران ..
وفين أمك يا فتّو ؟
راحت بيت الجيران !!
إشبها هذه الحرمة كلّ يوم عند الولية حرمة " ما كّان " أي " محمد خان " ..
راحت تشوف التكّة " الفستان " اللي جابلها العجوز من المدينة ..
يالله روحي وناديها وقولي ترى أبويا جاء جيعان بطنو يصوصو ..

وهكذا كانت المحبة والألفة بين الجيران أيام زمان .. وراح بيت الجيران وجاء من بيت الجيران .. كلمات كانت مألوفة وعادات كانت عادية جدا وليس فيها أي حرج .. بل جمعات الجارات الأسبوعية في بيت فلانة في الزقاق الفلاني .. كانت لقاءات على بساط أحمدي .. ويستناه الكل ..

وما أحلى ذاك المنظر المألوف الذي كان لا يغيب عن أزقتنا وشوارعنا أيام زمان وبالتحديد في رمضان قبل ساعة الإفطار .. تشوف الكبار يتجمعوا جمعة الغروب في أحاديث بريئة ..

والأولاد كل واحد في يدّو تبسي .. على فين يا ولد سكينة ؟؟ على بيت الجيران أوديلهم فطور .. وهكذا الشوارع تمتلأ بالمراسلين والمراسلات ..؟

وخاصة لمّن كنّا صغار .. تعرفوا العجائز يحبّو يمزحو مع البنات الصغار ويدخلوا الفرحة في قلوبهم .. يابنت : كيف طلع بليلة أمك اليوم ؟؟ وكنت أزعل وأشرد ..

ولكني ما أنسى السفرة وهي مليانة بعشرين صحن من " تليدّيا بليلة " البليلة المقلقة وكلها من بيت الجيران .. قبل الفطور ..

ولكن فين الجيران هذا الزمن الله يهدي الجميع .. حقد وحسد وفرقة ..

حتى صار .. فين راح أمك يا دلال ؟ والله راحت بيت الجيران !!
غريبة يا دلدل لا يكون أحد مات عندهم ؟؟
لا يا بابتي .. سوت أمي " دولار فيلا " وراحت توديلهم شويا ..

" دولار فيلا " إيش هذه يا " دلدل " ما تعرفي تنطقي مزبوط يابرماوية اسمو " بولا فيرا " الله يرزق أبوكي " دولار " و " فيلا " وفوقها " حرمه " قولي آمين ..

تن تن .. روحي فكي الباب يابنت ..
جات مامي يا بابي !!
أشبك يا ولية سلامتك !! إيش صار لك !! رحتي تاخدي لفة من عند بيت الجيران ؟؟ عسى خييييير ؟

آآآآه يا عجوزي ما قلتلك :

روحة بيت الجيران .. في هذا الزمان .. خرافة وجنان
وسلامتكم

 

[ندى الجنة]

موضوع راااائع جداً .. ضحكني موووت

من جد شكلك يا ( المسفلاوية ) من حارة ( أبو طبنجة ) زمان المنشيّة ..

بس موضوع جميل جدا ..

والله يرزق أبو دلال .. الدولار والفلّة .. إلاّ الحرمة ، لا يروح يجبلك الطرحرح ..

وتحياتي ياغاليتي

 

[الرائع]

موضوع جميل .. وأسلوب راااائع ومضحك ..
وتشخيص بديع لواقع أصبح الآن في خبر كان ..

ولكن إن شاء الله الأشياء الحلوة والجميلة رايح ترجع زيّ أيام المسفلة زمااان ..

وخاصة جماعتنا اللي يسكنوا فيها : زي أهل الرشد والكدوة والكنكارية .. فيهم أشياء حلوة ..

أشكرك : أخيتي .. بنت المسفلة " المسفلنجية "

 

[طالب]

أجدتي و أفدتي
يا واد الحق ع البليلة بليلة حلوة
ولزيزة
يا دلدل دق التحية للمسفلجية
ودمتم في حفظه

 

[ريماس]

فعلا موضوع رائع جدا
ما أخفي عليكي تراني من المسفلة
صراحة ضحكت وحزنت في نفس الوقت
ضحكت على طرح الموضوع بإسلوب جميل جدا
وحزنت على أيام الجيرة القديمة يا سلام والله أيام ما تنسى طبعت في الذاكرة
تعالي شوفي دحين تجي تعاتبي جارتك عشان ما زارتك تقوم تطلعلك مليون عذر طبعا هذا مو في الحواري الشعبية
ترى الجمعات النسوانية في المسفلة لسع موجودة إذا تبي ترجعي أيام زمان تعالي بيت أهلي
على العموم يا قلبي موضوعك في قمة الروعة

 

[أسومي]

يا ربي على أيام زمان والله زمان كلااااااام

بس شوف الحين حسبي الله ونعم الوكيل

لا في تواصل ولا أخبار عن الجيران ولا هم يحزنون

والله أحلى أيام في حياة المكي أيام التسعينات

أيام كانت حلوة مليئة بالحب والتواصل

والله كم أشتاق لهذه الأيام عسى الله يرجع أيامنا الحلوة

موضوع رائع والله كل شي عن مكة رائع

مسفلاوية بداية رائعة منك وحلوة بعد

أتمنى تستمرين بالنهج المكاوي حتى نتذكر أيامنا

تحياتي ,,,

 

[ابو وجدان البرماوي]

في بداياتك حلو جدا

ونحن في انتظار ابداعاتك

 

[المسفلاوية]

يابنت اللي مسميه نفسك ( ندى الجنة ) مني من جماعة ( بابو هنكلي ) تكرونية من حارة أبو طبنجية جهة المنشية أنا برماوية مسفلنجية كدونجية .. أمزح معاك يابنت أشكرك على الرأي

أخي الرائع .. كلامك صحيح ماعليه غبار

الواد اسماعيل .. أشكرك ياولدي على المشاركة

برماوي في قلوبهم .. إيش هدا الاسم الغريب ماعرفت معناه .. بس مشكور وإن كنت زعلان منك على تطبيلك مع " الباشا "

بخور الرياض .. إيش لك وإيش للهجة المكاوية .. خليك في " ساااام " و " إيش لونك " و " أقدع "
حياك ياولدي .. ووفر فلوسك تساعد أمك في مكة ، مو تروح تطير يمين شمال .. ها ..

أختي أم علاء : والله يبغالها غطرفه طويلة عشان فرحتيني إنك من المسفلة .. يابنت لا تكوني من بكر شرف وللا من الكدوة ؟؟ على أية حال مشكوورة أخيتي ..

 

[طالب]

لا لا خليني عند البشكـــــة و الشــــــــلة و الفلة
و الله يرحم الوالدة يا المكاوية المسفلاوية

 

[دورسكوره]

يا مسفلاوية معاك مسفلاوي برماوي نابوجاوي يرحبووووووو

 

[المسفلاوية]

( يا بخور الرياض )
الله يوفقك ياولدي ويعينك على الغربة ويخليك لأمك الطيبة ..

( درسكوره )
لا أروح أفلت عليك عرّي :cat: .. ينهشك وما يبقي فيك شمره ولا قمره ..
حياك ياولد المسفله وسلملي على أمك الطيبة .. بس ما أدري إيش رايحه تكون أم ( الدرسكوره ) ؟؟

 

[يارا]

يؤ يؤ يبقى خلاص عشت مع جو هيدي الحكاية الحلوووووة

عم بتزكريني بباب الحارة يا "المسفلاوية " << مبعرف شو معناتن

ع كل تحيـــــــــــــــــــــــــــــــــــــــــــــــــــــــاتي الك يا حلا ويا ئشطه

 

[المهاجري]

حاااااااااااااااااااار يفووووووووووووووووووووول
والله من زمان على اللهجة المكاوية يفتووووووووووو
شوووووووووفي ياعباسية تراني مكاوي مسفلاوي من بكر شرف
والله موضوعك في عين الصواب
وين زمان لما يجو البنات عندنا ويدقووووووو الباب ويقولو (امي تسلم عليكم ووتقول عندكم طماطم)ااااااااااه زمان اول تحول
الواحد يموت وما يدري عن جارو
الله يرحمك ياخالة رجعتينا عشرين سنة ورا
ننتظر منك اخبار ايام القلوب النظيقة
محبكم /مكاوي أجرح واداوي

 

[صدى الحجاز]

مثل هذا الأسلوب يدل على ما تتمتع به الكاتبة من روح المرح والمزح.
وما أحوجنا إلى أمثالها لإنعاش المنتدى بالسواليف والطرائف.
وبالمناسبة اشتهيت لـ (تيلدِّيا بليلة)، يا الله عجل برمضان.

 

[لؤلؤة]

صادقة يالمسفلاوية من جد كان حماس أيام زمان أما دحين اذا تخرجي يقول فلانة جاءت فلانة راحت يروح هذا الكلام في المشرق والمغرب يارب رجع المسفلة مثل ماكان بأيام الحلوة الذي عشناها

 

[الرحّال]

وي وي يا ربي

ايش الكلمات هادي ...

الله يرحم أيام زمان

ومن جد الكلام المكاوي ما في زيه


يعطيك العافية يالمسفلاوية على الطرح الرائع ،،،

 

[المسفلاوية]

: يارا )
للمعلومية ترى أكتر الحضران يرجعوا أصلهم شوام ومصاريا .. بس كلام الشوام يجبلي الحساسية " هاتشوووو " الحمد لله happy

( المهاجري )
قلبتلي المواجع ياولدي .. بحكاية الطماطم ، الله يرجع هديك الأيام الحلوة !! أيام البساطة وعدم الكلفه !!

( صدى الحجاز )
ونونت في صمّاخة وداني بصداك الطيّب .. وشاكر لك !!

( الرحال )
أكيد الكلام المكاوي مافي زيّو ..
بس هذيلي النجديين حقّون " ساااااام " يسموه الكلام الزاحف ، يحسّبونا ضبّان .. هههه

( لولوا )
ذكرتيني بوحده جارتنا من التكارين ، اسمها ( لؤلؤة ) وكنّا ناديها زيّ أمّها ( لولوا .. الله كالله )
شاكرلك مشاعرك يا بنتي ..

 

[ابو وجدان البرماوي]

هاتشوووو " الحمد لله happy


يرحمك الله

 

[مدخل السرور في النفوس]

احــــــم :music: احــــم :music: احـــم :music: !!
احلـــى :clap: يالمسفلاويـة
كلماتك :clap: كواشـكاويــة
يا ربي على الأيام الحلوة ودي أبكي >>> :shy1: أهئ أهئ أهئ أهئ :shy1:أهئ أهئ أهئ

 

[أبو هيثم الشاكر]

إذا قيل لي اختر أظرف ثلاث شخصيات من أعضاء المنتدى فوالله لا أحيد عنك، ذكّرتِني بأيام زمان، أيام مدرسة التوحيدية، ذكّرتِني بقول الشاعر:
وحبّب أوطانَ الشباب إليهمُ***مآربُ قضّاها الشبابُ هنالِكا
إذا ذكروا أوطانهم ذكّتْهمُ***عهودَ الصِّبا فيها فحنّوا لذلِكا
لكِ ألف تحيّة